Iseggasen-a ineggura, yeṭṭuqqet uḥerbal ɣer wučči (allergie alimentaire) yettḥazen imeẓyanen.
Iseggasen-a ineggura, yeṭṭuqqet uḥerbal
ɣer wučči (allergie alimentaire) yettḥazen imeẓyanen. Yuɣal d aɣilif n
yimawlan, labeɛda di tallit anda ameẓyan ibeddu učči ixulfen ayefki. Ur
muxaf ara waṭṭan-a ma iban-d. Imi ddeqs n useḥbiber d tiririt n lewhi
ɣer wučči n umeẓyan, zemren ad ilin d tifrat ilaqen.
Amek id-yettban uḥerbal ɣer wučči ?
Ccirat
n uḥerbal ɣer wučči ttḥazent s umata aglim, am tcellibaḍ, tezweɣ,
akmaz, ligzima…atg. Tikkwal, ttemlilint akked tɛebbuḍt iserḥen, amɛuqqu,
iriran. Ttlalent-d deffir telqimt yettilin d ssebba n uḥerbal-a am
uyefki, timellalin, lḥut…atg. Tikkwal diɣ, ccirat-is cubant tid n waṭṭan
n ubeḥri: asiḥḥi n tanzarin, tusut d useffeṛ n yidmaren. Aya, iteffer
lahlak-a di tazwara. Ur d-yettban ara alamma ɛeddan ddeqs n wussan neɣ n
wagguren.
Acu n wučči i d-yeslalayen aḥerbal?
Ar
umaylul (nouveau-né), ala ayefki-nni n uquṭi i ixulfen win n tyemmat, i
izemren ad yili d ssebba n uḥerbal. Aneggaru-a, yeslalay-d iriran,
tezweɣ n wudem akk d imeṭṭi war aḥbas, mkul mi ara yeṭṭeḍ umaylul
abibṛun. Ɣef aya, ilaq ɣef yimawlan, ur stehzayen ara sdat ccirat am
tigi.
Mi ara yebdu uleqqaq ad
yessexlaḍ (gar setta d sebɛa n wagguren), ad itett ayen ixulfen ayefki,
yezmer ad d-iban ɣur-s uḥerbal mgal kra n leṣnaf n wučči ur tqebbel ara
tfekka-s, yecban timellalin, lḥut , ayefki, ayen akk yesɛan l’arachide. D
aṭuqqet n ccirat i ɣef i d-nemmeslay yakkan i yettwellihen imawlan
akken ad nadin ɣef sebba s amejjay. Aneggaru-a, ad inadi s telqay di
tgella n umeẓyan akken ad d-yaf ṣṣenf n wučči yellan d sebba n uḥerbal,
syin ad iwelleh imawlan akken ad as-t-kksen seg wučči-s ama i lebda neɣ i
kra kan n yiseggasen. Imi s umata, aḥerbal ɣer tmelllalin akked d
uyefki, yezmer ad iruḥ s teɣzi n lweqt, ma d win n l’arachide yettɣimi i
lebda.
Amek nezmer ad d-nessukkes arraw-nneɣ seg uḥerbal-a?
Yewwi-d
ɣef yimawlan, ad ẓren dakken ma yiwen gar-asen isɛa lehlak-a, mmi-s diɣ
yezmer ad t-yesɛu. Ɣas ur nessawaḍ ara ad neḥbes lehlak-a i d-iteddun d
yimeẓyanen, llan kra n yiwellihen, ma rran ɣur-sen imawlan lewhi,
zemren xersum ad d-sukksen arraw-nsen si kra n twaɣit.
1-Asuṭṭeḍ n umaylul : d lsas n useḥbiber, imi ulac i yecban ayefki n tyemmat i yessijhiden tafekka d tezmert.
2-Tikci
n telqimin timeẓyanin di tallit n beddu n usexleḍ n wučči : akken
tafekka ad tt-teqbel, ad tt-twalef. Labaɛda ma yella waṭṭan n uḥerbal di
twacult n llufan.
3-Anadi alqayan
deg wayen yesɛa wučči i d-tettaɣem: imi llan kra n yisufar ur nlaq ara i
yimeẓyanen ur newwiḍ ara aseggas, yerna zemren ad ilin d ababat n
lahlak.
Taggra
Ma
twalam kra n ccirat ɣer umeẓyan-nwen, umbeɛd abibṛun neɣ kra n wučči,
ilaq ad t-tawim s amejjay-is akken ad iẓer acu n sebba yellan. Ma
yeḍḥa-d, yesɛa aḥerbal, yewwi-d fell-awen ad as-tekksem kra n wučči
yellan d sebba n waya.
Salima Dali
Iwenniten