Ma drus 40% n tlawin i yettmagaren ugur n tarda ixerben ( troubles des régles).
Ma drus 40% n tlawin i yettmagaren ugur n
tarda ixerben (troubles des régles). D acu kan, ddeqs seg-sent, ur
ttarrant ara lewhi-nsent ɣer waya, ɣas tikkwal yezmer ad yeffer ddeqs n
waṭṭanen neɣ ad d-yeglu s lehlakat, labeɛda wid n yidammen. I wakken ad
tesɛum kra n tmussniwin ɣef tarda n tmeṭṭut d ssebbat n uxrab-ines,
nextar ad d-nerr dduṛt-a ɣef kra n yestaqsiyen yeɛnan asental-a.
D acu-tt tarda ?
D
ayen i d-iḍerrun daxel n lwalda. Iteffeɣ-d d idammen beṛṛa-ines ɣer
tmeṭṭut yesɛan gar 13 d 50 n yiseggasen s unekcum n ddeqs n thurmunin.
Tarda tettɣimi gar 4 d 6 n wussan, tettuɣal-d mkul 28 n wussan wer ma
tella deg wussan-nniḍen. D abeddel yettḥazen talliyin-a (anqas neɣ
azidi), rnu ɣur-s abeddel n tesmekta n yidammen i wumi neqqaṛ tarda
ixerben.
D acu i d-yettakken axrab n tarda ?
Anerni
ixuṣṣen neɣ acelleqluq (kyste) n waskiwen, aṭṭan yettḥazen lwalda am
ufibṛum, abeddel di tgella, tuzert, atqelleq d lxiq alqayan, abeddel n
thurmunin , wigi akk zemren ad d-ẓẓaẓen, ad sbaɛden tarda ɣer tmeṭṭut .
Yella diɣ, yiwen n waṭṭan mucaɛen ɣer telmeẓyin : aṭṭan n waskiwen
yeččuren d icellequqen (syndrome des ovaires polykystique) ; yessexrab
mlih tarda. Tikkwal, yessengar-itt. Llant tegnatin anda i d-igellu s
tiɛiqeṛt.
Melmi ara d-nemmeslay ɣef rwaḥ n tarda ?
Aɛeṭṭel
n tarda iɛeddan tlata n wagguren, neqqaṛ-as : rwaḥ n tarda. Yeslalay
lxuf meqqṛen, labeɛda ɣer tin ur nelli s tadist. S umata, tettḥaz
tameṭṭut izewǧen deffir tadist, neɣ umbeɛd asexdem iḍullen n tɛeqqacin n
uḥbas n dderya. Ula d aṭṭanen yezgan, lqella n wučči, atqelleq, zemren
ad ldin tawwurt i wugur-a.
Kra n tmusnniwin-nniḍen d yiwellihen.
Yesfek
ɣef yal tameṭṭut yesɛan ugur n tarda, ad terzu s amejjay akken ad tnadi
ɣef ssebba imi tezmer ad tili d aṭṭan yuklalen asejji lqayen, labaɛda
imi assaɣ yellan ggar-as d dderya meqqeṛ . D acu kan, ilaq ad nẓer
belli, tameṭṭut uqbel ad tt-teǧǧ tarda (50 n yiseggasen), tettmagar
axrab n tarda s waṭas am yal yiwet, akken diɣ llant tid i d-yettlalen s
tarda yettɣimin ddaw n 4 neɣ ugar n 6 n wussan wer ma tella d ugur.
Salima dali
Iwenniten